गौरी विसर्जनाच्या आनंदात, दोन मुली बुडाली तलावात
काटोल : - गौरी विसर्जनाच्या आनंदात सहभागी होण्यासाठी आईसोबत तलावावर गेलेल्या दोन शाळकरी मुलांचा पाण्यात बुडून दुर्दैवी मृत्यू झाला. विसर्जनाचा विधी सुरू असतानाच दोन्ही मुले तलावाच्या काठाजवळील उथळ पाण्यात उतरली; मात्र नकळतपणे ती खोल पाण्यात गेली आणि बुडाली. काही वेळाने मुले दिसत नसल्याचे लक्षात आल्यानंतर ग्रामस्थांनी तलावात शोधमोहीम सुरू केली. अखेर दोन्ही मुलांना पाण्यातून बाहेर काढून रुग्णालयात दाखल करण्यात आले; मात्र डॉक्टरांनी त्यांना मृत घोषित केले. या हृदयद्रावक घटनेमुळे काटोल तालुक्यातील झिलपा गावावर शोककळा पसरली आहे.
मिळालेल्या माहितीनुसार, मंगळवारी झिलपा परिसरातील काही महिला गौरी विसर्जनाच्या धार्मिक विधीसाठी आपल्या मुलांसह गावाजवळील तलावावर गेल्या होत्या. आयुष हरीश कुमार आणि दर्शन ऊर्फ दक्ष धनराज लाड हे दोघेही आपल्या आईसोबत विसर्जनासाठी तलावावर गेले होते. आयुष हा इयत्ता आठवीत, तर दर्शन हा इयत्ता सातवीत शिक्षण घेत होता. दोघेही झिलपा येथील रहिवासी होते.
महिला गौरी विसर्जनाचा विधी करत असताना दोन्ही मुले तलावाच्या काठाजवळील उथळ पाण्यात उतरली. सुरुवातीला पाणी कमी असल्याने धोका जाणवला नाही. मात्र खेळता खेळता किंवा पाण्यात पुढे जाताना दोन्ही मुले नकळत खोल पाण्याच्या भागात गेल्याचा प्राथमिक अंदाज आहे.
विसर्जनाचा विधी सुरू असताना काही वेळाने आयुष आणि दर्शन दिसत नसल्याचे महिलांच्या लक्षात आले. आजूबाजूला शोध घेतल्यानंतरही दोन्ही मुले आढळून न आल्याने त्यांच्या बुडाल्याची शक्यता व्यक्त करण्यात आली. त्यानंतर परिसरात एकच खळबळ उडाली.
घटनेची माहिती मिळताच मुलांचे काका आणि ग्रामस्थांनी तत्काळ तलावाकडे धाव घेतली. कोणतीही वाट न पाहता ग्रामस्थांनी तलावात उतरून दोन्ही मुलांचा शोध सुरू केला. उपलब्ध साधनांच्या मदतीने पाण्यात शोधमोहीम राबवण्यात आली.
ग्रामस्थ आणि नातेवाईकांच्या प्रयत्नांनंतर अखेर दोन्ही मुलांचा ठाव लागला. त्यांना पाण्यातून बाहेर काढण्यात आले आणि तातडीने काटोल ग्रामीण रुग्णालयात नेण्यात आले. डॉक्टरांनी दोन्ही मुलांची तपासणी केली. मात्र उपचारापूर्वीच त्यांचा मृत्यू झाल्याचे डॉक्टरांनी घोषित केले. या घटनेची माहिती मिळताच कुटुंबीयांवर दुःखाचा डोंगर कोसळला. अवघ्या सातवी आणि आठवीत शिकणाऱ्या दोन मुलांचा अशा प्रकारे दुर्दैवी अंत झाल्याने झिलपा गावातील नागरिकांमध्ये हळहळ व्यक्त होत आहे
दरम्यान, या घटनेची माहिती काटोल पोलिसांना देण्यात आली असून, घटनेबाबत पुढील कायदेशीर प्रक्रिया सुरू करण्यात आली आहे. तलाव परिसरात धार्मिक कार्यक्रम किंवा विसर्जनाच्या वेळी लहान मुलांनी पाण्यात जाऊ नये, तसेच पालकांनी मुलांकडे विशेष लक्ष ठेवावे, अशी गरज या दुर्घटनेतून पुन्हा अधोरेखित झाली आहे.
