लाचखोर वन कर्मचाऱ्यांना एसीबी ने पकडले रंगेहाथ, तीन कर्मचाऱ्यांना घेतले कवेत
भद्रावती: येथे जप्त केलेला ट्रॅक्टर सोडण्यासाठी २० हजार रुपयांची लाच स्वीकारताना भद्रावती वनपरिक्षेत्र कार्यालयातील क्षेत्र सहाय्यक, बीट वनरक्षक आणि एका वनमजुराला रंगेहात पकडण्यात आले. या कारवाईमुळे भद्रावती परिसरासह शासकीय वर्तुळात तीव्र खळबळ उडाली आहे.
चंद्रपूर एसीबीने दिलेल्या माहितीनुसार, क्षेत्र सहाय्यक कोमल गुगलोत, बीट वनरक्षक संदीप पारवे आणि वनमजूर ललित नागपुरे अशी लाचखोरांविरुद्ध कारवाई करण्यात आलेल्या कर्मचारी यांचे नावे आहेत. तक्रारदाराच्या ट्रॅक्टरवर वनविभागाने काही दिवसांपूर्वी दंडात्मक किंवा कायदेशीर कारवाई केली होती. हा जप्त केलेला ट्रॅक्टर सोडण्याच्या मोबदल्यात क्षेत्र सहाय्यक गुगलोत आणि वनरक्षक पारवे यांनी तक्रारदाराकडे २० हजार रुपयांच्या लाचेची थेट मागणी केली होती.
तक्रारदाराची लाच देण्याची इच्छा नसल्याने त्यांनी या प्रकरणी थेट लाचलुचपत प्रतिबंधक विभाग, चंद्रपूर येथे जाऊन रीतसर तक्रार नोंदवली. एसीबीच्या पथकाने तक्रारीची अत्यंत गुप्तपणे प्राथमिक पडताळणी केली असता, त्यात शासकीय कर्मचाऱ्यांनी लाच मागितल्याचे निष्पन्न झाले. त्यानंतर सोमवारी भद्रावती वनपरिक्षेत्र कार्यालयात एसीबीने आपल्या कौशल्याने सापळा रचला.
ठरल्याप्रमाणे तक्रारदार लाचेची रक्कम देण्यासाठी कार्यालयात पोहोचले. लाचेची २० हजार रुपयांची रक्कम स्वीकारताच एसीबीच्या पथकाने छापा मारून कोमल गुगलोत आणि संदीप पारवे यांना ताब्यात घेतले. या संपूर्ण गैरप्रकारात वनमजूर ललित नागपुरे याचाही प्रत्यक्ष सहभाग आणि मध्यस्थी आढळून आल्याने त्यालाही पथकाने तात्काळ ताब्यात घेतले.
या प्रकरणी तिन्ही आरोपींविरुद्ध भ्रष्टाचार प्रतिबंधक कायदा, १९८८ (सुधारित २०१८) च्या विविध कलमान्वये गुन्हा दाखल करण्याची प्रक्रिया सुरू करण्यात आली आहे. या यशस्वी कारवाईमुळे भद्रावती परिसरात मोठी खळबळ उडाली असून शासकीय कार्यालयांमधील भ्रष्टाचार खपवून घेतला जाणार नाही, असा सडेतोड इशाराच एसीबीच्या या धडक कारवाईने दिला आहे. प्रकरणाचा पुढील तपास चंद्रपूर एसीबीचे पथक करीत आहेत.
