खेळत असताना दुचाकीच्या बॅटरीच्या स्फोटात लहान बालकाचा करुण अंत
अहेरी:- गडचिरोली जिल्ह्यातील अहेरी तालुक्यातील जवळच असलेल्या गुडेम गावात दुचाकीच्या बॅटरीचा स्पोट होऊन लहान बालकाचा करुण अंत झाल्याची घटना घडली आहे. दुचाकी वाहनाच्या बॅटरीशी खेळताना अचानक झालेल्या शॉर्टसर्किटमुळे आणि त्यानंतर झालेल्या भीषण स्फोटामुळे एका १४ वर्षीय मुलाला आपला जीव गमवावा लागला. लोकेश गणेश निकाले असे या मृत दुर्दैवी बालकाचे नाव आहे. या घटनेमुळे संपूर्ण अहेरी तालुक्यात हळहळ व्यक्त केली जात आहे.
मिळालेल्या माहितीनुसार, लोकेश हा घरी दुचाकी वाहनाच्या बॅटरीसोबत खेळत होता. खेळत असताना अचानक बॅटरीमध्ये जोरदार शॉर्टसर्किट झाले आणि भयानक स्फोट झाला. या अनपेक्षित आणि भीषण स्फोटामुळे लोकेशच्या चेहऱ्याला गंभीर दुखापत होऊन तो रक्ताच्या थारोळ्यात जागीच कोसळला.
घटनेनंतर गंभीर जखमी अवस्थेतील लोकेशला पाहून कुटुंबीयांना मोठा धक्का बसला. त्यांनी तातडीने त्याला उपचारासाठी नेण्याची धावपळ सुरू केली. लोकेशची अत्यंत गंभीर अवस्था पाहता, त्याला पुढील तातडीच्या उपचारासाठी शेजारच्या तेलंगणा राज्यातील 'कागज नगर' येथील रुग्णालयात नेण्याचा निर्णय घेण्यात आला. मात्र, रुग्णालयात पोहोचण्यापूर्वीच वाटेत त्याची प्राणज्योत मालवली.
एकुलत्या मुलाच्या अशा अकाली जाण्याने निकाले कुटुंबावर दुःखाचा डोंगर कोसळला असून, गुडेम गावातील नागरिक अगदीं सुन्न झाले
