ग्रामपंचायतीच्या दुर्लक्षामुळे नागरिक संतप्त; तातडीने दुरुस्तीची मागणी
आष्टी,(अशोक खंडारे):-
चामोर्शी तालुक्यातील अनखोडा गावात गेल्या सहा महिन्यांपासून सार्वजनिक हॅन्डपंप बंद अवस्थेत असल्याने ग्रामस्थांना तीव्र पाणीटंचाईचा सामना करावा लागत आहे. पिण्याच्या पाण्यासाठी महिलांना, ज्येष्ठ नागरिकांना आणि लहान मुलांना मोठी पायपीट करावी लागत असून ग्रामपंचायतीच्या कथित दुर्लक्षामुळे नागरिकांमध्ये तीव्र नाराजीचे वातावरण निर्माण झाले आहे.
गावातील अनेक कुटुंबांचा मुख्य आधार असलेला हा हॅन्डपंप बंद पडल्यापासून त्याची दुरुस्ती करण्यात आलेली नाही. याबाबत ग्रामस्थांनी वेळोवेळी ग्रामपंचायत प्रशासनाकडे तक्रारी आणि निवेदने दिल्याचा दावा केला आहे. मात्र अद्याप कोणतीही ठोस कार्यवाही झालेली नसल्याने नागरिकांचा संयम संपत चालला आहे.
गावातील महिलांना दररोज पिण्याचे पाणी मिळविण्यासाठी दूरवर जावे लागत असून त्यामुळे त्यांचा वेळ आणि श्रम मोठ्या प्रमाणात वाया जात आहेत. उन्हाळ्यात ही समस्या अधिक गंभीर बनली होती, तर आता पावसाळ्याच्या तोंडावरही प्रशासनाने याकडे दुर्लक्ष केल्याचा आरोप ग्रामस्थांनी केला आहे.
स्थानिक नागरिकांच्या म्हणण्यानुसार, शासन ग्रामीण भागातील नागरिकांना शुद्ध व पुरेसे पिण्याचे पाणी उपलब्ध करून देण्यासाठी विविध योजना राबवत असताना अनखोडा गावात मात्र मूलभूत सुविधांकडे दुर्लक्ष होत असल्याचे चित्र दिसून येत आहे. हॅन्डपंप दुरुस्तीसाठी आवश्यक असलेला खर्च आणि तांत्रिक प्रक्रिया मोठी नसतानाही सहा महिने लोटूनही प्रश्न कायम असल्याने ग्रामस्थांनी आश्चर्य व्यक्त केले आहे.
ग्रामस्थांनी संबंधित विभाग आणि ग्रामपंचायत प्रशासनाला तातडीने लक्ष घालून हॅन्डपंप सुरू करण्याची मागणी केली आहे. येत्या काही दिवसांत समस्या सोडविण्यात आली नाही तर ग्रामस्थांना आंदोलनाचा मार्ग स्वीकारावा लागेल, असा इशाराही नागरिकांनी दिला आहे.
अनखोडा गावातील पिण्याच्या पाण्याचा प्रश्न त्वरित निकाली काढून नागरिकांना दिलासा देण्याची अपेक्षा व्यक्त होत आहे. आता ग्रामपंचायत आणि संबंधित यंत्रणा याकडे किती गांभीर्याने पाहतात, याकडे संपूर्ण गावाचे लक्ष लागले आहे.
