चामोर्शी येथील नवीन बसस्थानकाचे बांधकाम पूर्ण होऊनही उद्घाटनाची अजूनही प्रतिक्षाच
वैनगंगा वार्ता १९
चामोर्शी - तालुका स्थळ येथील नवीन बसस्थानकाचे बांधकाम पूर्ण होऊनही उद्घाटनाची अजूनही प्रतिक्षाच करावी लागत आहे बसस्थानकाचे व्दार बंद असल्याने नागरिक आणि विद्यार्थ्यांमध्ये तीव्र नाराजी व्यक्त केली जात आहे. लवकरात लवकर बसस्थानक चालू करावे अशी मागणी केली जात आहे
चामोर्शी येथील नवे बसस्थानक तयार असूनही केवळ उद्घाटन न झाल्यामुळे बंद ठेवण्यात आले आहे. परिणामी जुन्याच ठिकाणी किंवा रस्त्याच्या कडेला बसेस लावाव्या लागत आहेत.
पावसाळ्यात ही समस्या अधिक गंभीर झाली आहे. पावसात नागरिक व विद्यार्थ्यांची मोठी गैरसोय होत असल्याचे परिसरातील शाळकरी मुला-मुलींना व जनतेला सर्वात जास्त त्रास सहन करावा लागत आहे
गडचिरोली जिल्ह्यातील चामोर्शी तालुका हा ग्रामीण आणि आदिवासी बहुल भाग आहे. इथले शेकडो विद्यार्थी रोज एसटीने शाळा-कॉलेजला जातात.
नवीन बसस्थानक बंद असल्याने विद्यार्थ्यांना उन्हात आणि पावसात उघड्यावर उभे राहावे लागते. मुख्य रस्त्यावरच बसेस थांबत असल्याने गर्दी आणि अपघाताचा धोका वाढला आहे. "अपघाताची वाट का बघता" ही नागरिकांची संतप्त प्रतिक्रिया याच कारणामुळे आहे. सध्या शाळांच्या परीक्षा सुरू असताना वाहतूक कोंडी किंवा बस उशिरा आल्यास विद्यार्थ्यांचे शैक्षणिक नुकसान होते. काही दिवसांपूर्वीच चामोर्शी - गडचिरोली मार्गावर ट्रक फसल्याने वाहतूक ठप्प झाल्याने शालेय विद्यार्थ्यांची मोठी गैरसोय झाली होती.
यापूर्वीही चामोर्शीतील विद्यार्थ्यांच्या बस प्रश्नावर चक्काजाम आंदोलन झाले होते आणि त्यानंतर तक्रारींची दखल घेण्यात आली होती.
नागरिकांची मागणी
नवीन बसस्थानकाचे तात्काळ लोकार्पण करून ते प्रवासी सेवेत सुरू करावे. • शाळेच्या वेळेत जास्तीच्या बसेस सोडाव्यात. • बसस्थानक परिसरात पिण्याचे पाणी, स्वच्छतागृह आणि विद्यार्थिनींसाठी स्वतंत्र प्रतीक्षा कक्षाची सुविधा द्यावी. • जोपर्यंत नवीन स्थानक सुरू होत नाही, तोपर्यंत तात्पुरता निवारा आणि प्रकाश व्यवस्था करावी.
गावकऱ्यांचे म्हणणे आहे की, कोट्यवधी रुपये खर्चून बांधलेले बसस्थानक केवळ उद्घाटनाच्या प्रतिक्षेत धूळ खात पडणे हे शासनाच्या निष्क्रियतेचे लक्षण आहे. शाळकरी मुलांच्या सुरक्षिततेसाठी प्रशासनाने तातडीने निर्णय घ्यावा, अशी मागणी जोर धरत आहे.
