पिसाळलेल्या कुत्र्याचा पहाटे सात जणांवर हल्ला; गंभीर जखमींवर गडचिरोलीत उपचार सुरु
उपसरपंच सौरभ पाल यांची तत्परता; माहिती मिळताच सातही जखमींना चामोर्शी ग्रामीण रुग्णालयात केले दाखल
चामोर्शी, 20 सप्टेंबर 2026::- चामोर्शी तालुक्यातील मुरखडा चक येथे कुत्र्याने अक्षरशः धुमाकूळ घालत एकाच पहाटे सात जणांना चावा घेतल्याची धक्कादायक घटना रविवारी पहाटे साडेपाचच्या सुमारास घडली.
कुत्र्याच्या हल्ल्यात सातही जण जखमी झाले आहेत. दरम्यान, घटनेची माहिती मिळताच मुरखळा चकचे उपसरपंच सौरभ पाल यांनी तातडीने मदतीसाठी धाव घेत सातही जखमींना चामोर्शी ग्रामीण रुग्णालयात दाखल केले त्यांच्या या तत्परतेमुळे जखमींना वेळेत वैद्यकीय उपचार मिळण्यास मदत मिळाली
मिळालेल्या माहितीनुसार, रविवारी पहाटे साडेपाचच्या सुमारास मुरखळा चक येथे पिसाळलेल्या कुत्र्याने नागरिकांवर अचानक हल्ला केला. या हल्ल्यात सात जणांना कुत्र्याने चावा
घेतल्याने गावात एकच खळबळ उडाली. अचानक घडलेल्या या घटनेमुळे नागरिकांमध्ये भीतीचे वातावरण निर्माण झाले.
या घटनेत विलास रामदास रोहनकर(वय ५२), धनराज रोहनकर (वय ७८), पत्रुजी किसन घोडे (वय ६५), मयूर गिरीधर शेंद्रे (वय २४), ध्रुव तुकाराम ठेमस्कर (वय ५४), शामराव बालाजी कुणघाटकर (वय ५५) आणि शिलाबाई डोमु गोवर्धन (वय ४०) हे सात जण जखमी झाले. सर्व जखमी मुरखळा चक, ता. चामोर्शी येथील रहिवासी आहेत
वेळ न दवडता त्यांनी सातही जखमींना चामोर्शी ग्रामीण रुग्णालयात दाखल केले.
अशा आपत्कालीन परिस्थितीत जखमींना वेळेत रुग्णालयात पोहोचविणे महत्त्वाचे असते. सौरभ पाल यांनी प्रसंगावधान राखून केलेल्या या मदतीमुळे जखमींना तातडीने वैद्यकीय उपचार मिळण्यास मदत झाली. त्यांच्या या तत्परतेचे परिसरात कौतुक होत आहे.
प्राथमिक उपचारानंतर सातही जखमीना चामोर्शी ग्रामीण रुग्णालयात वैद्यकीय अधिकारी डॉ. मयंक करमणकर यांनी जखमींवर प्राथमिक उपचार केले.
तसेच सर्व जखमींना अँटी रेबीज व्हॅक्सिन देण्यात आले.
मात्र, ग्रामीण रुग्णालयात आवश्यक असलेले रेबीज इम्युनोग्लोब्युलिन
(सिरम) उपलब्ध नसल्याने सातही जखमींना पुढील उपचारासाठी गडचिरोली जिल्हा सामान्य रुग्णालयात
पाठविण्यात आले. सिरम उपलब्ध नसल्यामुळे रुग्णांना गडचिरोली येथ हलवावे लागत असल्याची माहिती वैद्यकीय अधिकारी डॉ. मयंक करमणकर यांनी दिली
चामोर्शी हा गडचिरोली जिल्ह्यातील मोठ्या तालुक्यांपैकी एक असून, तालुक्यातील ग्रामीण भागातील नागरिक मोठ्या प्रमाणावर उपचारासाठी चामोर्शी ग्रामीण
रुग्णालयावर अवलंबून आहेत. अशा परिस्थितीत कुत्रा चावल्यासारख्या तातडीच्या आरोग्यविषयक प्रसंगी आवश्यक रेबीज इम्युनोग्लोब्युलिन
(सिरम) उपलब्ध नसणे ही बाब चिंताजनक असल्याची प्रतिक्रिया नागरिकांकडून व्यक्त होत आहे.कुत्रा चावल्यानंतर वेळेत योग्य उपचार मिळणे महत्त्वाचे असते. मात्र,आवश्यक औषध उपलब्ध नसल्याने रुग्णांना पुढील उपचारासाठी गडचिरोलीपर्यंत जावे लागत असल्याने ग्रामीण भागातील नागरिकांना अतिरिक्त त्रास सहन करावा लागत आहे.
त्यामुळे आरोग्य विभागाने या घटनेची गांभीर्याने दखल घेऊन चामोर्शी ग्रामीण
रुग्णालयात अँटी रेबीज
व्हॅक्सिनसोबतच आवश्यक रेबीज इम्युनोग्लोब्युलिन (सिरम) चा पुरेसा साठा कायम उपलब्ध ठेवावा, अशी मागणी नागरिकांकडून होत आहे
मुरखळा चक येथे एकाच पहाटे सात जणांवर कुत्र्याने हल्ला केल्याने नागरिकांच्या सुरक्षिततेचा प्रश्न
ऐरणीवर आला आहे. गावात पुन्हा अशी घटना घडू नये, यासाठी संबंधित यंत्रणेने तातडीने उपाययोजना
कराव्यात आणि पिसाळलेल्या कुत्र्याचा
बंदोबस्त करावा, अशी मागणी ग्रामस्थांकडून होत आहे
